இன்று நவீன வாதிகளால் பிரச்சினையாக்கப்பட்டுள்ள விஷயங்களில் குனூத்தும் ஒன்று.
ஷாபிஈ மத்ஹபில் சுப்ஹுத் தொழுகையில் குனூத் ஓதுவது சுன்னத். ஆனால் குனூத்திற்கு ஹதீஸ்களில் ஆதாரமில்லை என அங்கலாய்கின்றனர். ஹதீஸ்களை மெத்தப்படித்துக் தேர்ந்த இந்த மேதைகள்(?)
ஹதீஸ்களில் தராதரங்களைப் பற்றிய அரிச்சுவடி கூட அறியாத அப்பாவிகள் நபிமொழிகளில் ஆழ்ந்த ஞானம் பெற்றுவிட்டவர்களைப் போன்று பசப்பு வார்த்தைகளால் பாமர மக்களின் உள்ளத்தில் விஷ வித்துக்களை தூவி அவர்களை குழப்பி அற்ப சுகம் காணுகின்றனர்.
சவூதியின் சாக்கடைக் கொள்கைகளை பிரசாரம் புரிந்து தேவைக்கதிகமாக சொத்து சேர்த்து விட்டாயே! இன்னும் ஏனிந்த குழப்பங்களைச் செய்கின்றாய்? என வஹ்ஹாபிஸ கைக்கூலியிடம் நண்பரொருவர் தன் வேதனையை வெளிப்படுத்தியபோது அந்த ஏஜென்ட் எனக்குக் கூலி கிடைக்கிறது. அதற்கான வேலையைச் செய்கிறேன். மக்கள் குழம்பினால் அதற்கு நானா பொறுப்பு? எனப் பதில் கூறினாராம்.
பாமரர்கள்தான் இவர்களின் வெளி வேஷத்தில் அறிவை அடகு வைத்திருக்கிறார்கள் என்றால் சுன்னத் வல் ஜமாஅத் கொள்கையைப் போதிக்கும் மத்ரஸாக்களில் கற்றுத்தேறி பட்டம் பெற்ற அக்கொள்கையை தம் உயிர் மூச்சாகக் கொண்டு செயற்பட்ட அக்கொள்கையினை பிரசாரம் புரிந்த சிலதுகள் கூட அரபு நாட்டுச் சுகங்களில் புரண்டு தம் கொள்கையை அடகு வைக்கத் துணிகின்றனரென்றால் அவர்களை என்னவென்பது? எல்லாம் வல்ல அல்லாஹ் இவர்களுக்கு ஹிதாயத் - நேர்வழியை மீண்டும் தந்திட துஆச் செய்வதைத் தவிர வேறு வழியில்லை.
இமாமுனா ஷாபிஈ ரஹ்மத்துல்லாஹி அலைஹி அவர்கள் மிகச் சிறந்த நபிமொழிக் கலை வல்லுனர் மட்டுமல்ல! நபி மொழிகளிலிருந்து பிக்ஹ் சட்டங்களை உருவாக்குவதற்கு ஒரு அடிப்படை விதியை ஏற்படுத்தி அறிவற்றவர்களும் அனாமதேயங்களும் மார்க்கத்தில் புகுந்து தம் கை வரிசையைக் காட்ட முடியாது வேலியிட்டுத்தடுத்த சட்டமேதை.
சட்டமேதை என்று கூறினாலே இது இமாமுனா ஷாபிஈ ரஹ்மத்துல்லாஹி அலைஹி அவர்களையே சுட்டிக் காட்டுகிறது. இஸ்லாமிய உலகம் போற்றும் அத்தகு மேதையவர்கள் ஆதாரபூர்வமான நபிமொழிகளின் அடிப்படையில் சுபுஹுத் தொழுகையில் குனூத் ஓதுவது சுன்னத் என்ற விதியை அமைக்க அதனை ஷாபிஈயாக்கள் கடைப்பிடித்தும் வருகின்றனர்.
ஆனால் நேற்றுப்பெய்த மழையில் இன்று முளைத்த இந்தக் காளான்கள் குனூத் ஓத நபி மொழிகளில் ஆதாரமில்லை என கூப்பாடு போடுகின்றன.
எனவே குனூத் ஓதுவதற்கு ஹதீஸ்களில் ஆதாரமுண்டா? என்பதைப் பார்ப்போம்.
1. நபிகள் நாயகம் ஸல்லல்லாஹு அலைஹிவஸல்லம் அவர்கள் ஸுப்ஹுத் தொழுகையில் குனூத் ஓதுபவர்களாக இருந்தனர்.
அறிவிப்பாளர் : அல் பர்ராஉ (ரழி)
நூல் : அபூதாவூத்
2. அனஸ் இப்னு மாலிக் ரழியல்லாஹு அன்ஹு அவர்களிடம் ஸுப்ஹுத் தொழுகையில் ரஸுல் ஸல்லல்லாஹு அலைஹிவஸல்லம் அவர்கள் குனூத் ஓதினார்களா? என வினவப்பட்டபோது ஆம் எனப் பதிலிறுத்தனர். ருகூஉக்கு முன்னரா? பின்னரா? என வினவ ருகூஉக்குப் பின்னர் என விடை பகர்ந்தனர்.
நூல் : அபூதாவூத் பாகம் 1, பக்கம் 313
3. ரஸுல் ஸல்லல்லாஹு அலைஹிவஸல்லம் அவர்கள் இவ்வுலகை விட்டுப் பிரியும் (வபாத்) வரை சுப்ஹில் குனூத் ஓதுபவர்களாக இருந்தார்கள்.
அறிவிப்பாளர் : அனஸ் இப்னு மாலிக் ரழியல்லாஹு அன்ஹு
நூல் : தாரகுத்னி பாகம் 2, பக்கம் 39-41
முஸன்னப் அப்துர் ரஸ்ஸாக் பாகம் 3, பக்கம் 110
அத்காறுந் நவவி : பக்கம் 57
4. அபூபக்கர் ரழியல்லாஹு அன்ஹு, உமர் ரழியல்லாஹு அன்ஹு இருவரும் சுப்ஹுத் தொழுகையில் ருகூஉக்குப் பின்னர் குனூத் ஓதினார்கள்.
அறிவிப்பாளர் : அபூ உத்மான்
நூல் : தாரகுத்னி, பைஹகீ
5. அல் அவாம் இப்னு ஹம்ஸா கூறுகின்றார்கள்.
ஸுப்ஹின் குனூத் பற்றி அபூ உத்மான் ரழியல்லாஹு அன்ஹு அவர்களிடம் கேட்டேன். அதற்கவர் அது ருகூஉக்குப் பின்னர் என்றார். யாரிடமிருந்து இதனைத் தெரிந்து கொண்டீர்கள் என்று கேட்டபொழுது அபூபக்கர் ரழியல்லாஹு அன்ஹு, உதுமான் ரழியல்லாஹு அன்ஹு ஆகியோரிடமிருந்து என்று பதில் கூறினார்.
அறிவிப்பாளர் : யஹ்யா இப்னு சயீது
நூல் : காமில் இப்னு அதிய்யி
6. நான் உமர் ரழியல்லாஹு அன்ஹு அவர்களுடன் ஊரிலும், பிரயாணத்திலும் தொழுதிருக்கிறேன். அன்னார் ஸுப்ஹில் ருகூஉக்குப் பின் குனூத் ஓதுபவர்களாக இருந்தார்கள். மற்ற தொழுகைகளில் குனூத் ஓதுவதில்லை.
அறிவிப்பாளர் : அல் அஸ்வத்
நூல் : பைஹகீ
7. உமர் ரழியல்லாஹு அன்ஹு அவர்கள் ஸுப்ஹுத் தொழுகையில் ருகூஉக்குப் பின் இரு கரங்களையும் உயர்த்தி சப்தமிட்டு துஆ கொண்டு குனூத் ஓதுவார்கள்.
அறிவிப்பாளர் : அபூராபி
நூல் : பைஹகீ
அண்ணலார் ஸல்லல்லாஹு அலைஹிவஸல்லம் அவர்களும் அன்புத் தோழர்களும் குனூத் ஓதினர் என்பதற்கான ஹதீஸ்களே இவை.
ஹதீஸ்களை கரைத்துக் குடித்துவிட்டதாக மனப்பால் குடிக்கும் நவீன (?) வீணர்களே! இந்த ஹதீஸ்களுக்கு என்ன விளக்கம் சொல்லப் போகின்றீர்கள்?.
நன்றி : புஷ்றா - இதழ் 5 ஜூலை – ஆகஸ்ட் 2006
.jpg "புத்தளம் விருதோடை அல் ஜாமிஅத்துல் அஸீஸிய்யா")
.jpg)
